Roedd mis Tachwedd yn fis prysur arall i Lan yr Afon. Er i'r tywydd y tu allan droi'n oer a theatrau'n wynebu cyfyngiadau pellach gyda chyflwyno Pasbort Covid ar gyfer mynychwyr digwyddiadau a sinemâu, parhaodd Glan yr Afon i fod yn fwrlwm o weithgarwch oherwydd rhaglen theatr brysur a gweithgarwch cymunedol gwych.
Mis Tachwedd hefyd oedd y mis pan gafodd Gemma Durham ei phenodi gan Casnewydd Fyw yn Bennaeth Theatr, Celfyddydau a Diwylliant newydd Theatr a Chanolfan Gelfyddydau Glan yr Afon. Bydd y rôl bwysig hon yn gyfrifol am arwain rhaglen y celfyddydau ar gyfer Theatr a Chanolfan Gelfyddydau Glan yr Afon yn ogystal â chynnig diwylliannol ehangach ledled Casnewydd a'r cyffiniau.
Dywedodd Gemma Durham, "Rwyf wrth fy modd o gael y swydd wych hon yng Nghasnewydd Fyw ac o allu gweithio gyda'r tîm gwych yng Nglan yr Afon. Maen nhw’n gweithio'n eithriadol o galed i gynnig cyfleoedd i bobl ledled y ddinas fod yn greadigol a mwynhau'r celfyddydau ac edrychaf ymlaen at y rôl y gallaf ei chwarae wrth weithio gydag nhw i ddatblygu ein gweithgarwch artistig a diwylliannol ar draws dinas Casnewydd."
Sioeau
Roedd mis Tachwedd yn fis llawn perfformiadau ar gyfer Glan yr Afon wrth i sioeau ddychwelyd yn llawn i'r Prif Awditoriwm a’r Theatr Stiwdio.
Cyflwynodd Ballet Cymru ddwy sioe eithriadol, Giselle a Made in Wales, gyda chast o ddawnswyr cyfareddol penigamp. Roedd Made in Wales yn sioe arbennig iawn ar gyfer Glan yr Afon gan ei bod yn nodi'r unig ddyddiad yng Nghymru ar gyfer y bil triphlyg a oedd yn cynnwys Cerys Matthews yn darllen darnau o waith Dylan Thomas ynghyd â thri pherfformiad newydd gan goreograffwyr newydd.
Aeth Fagin a Fly Half, dau gynhyrchiad a oedd i fod i gael eu cynnal yn wreiddiol yn 2020, i'r llwyfan o'r diwedd i ddiddanu cynulleidfaoedd drama gyda'u gweithiau gwreiddiol; cyflwynodd Sinfonia Cymru noson o gerddoriaeth glasurol gyda'r chwaraewr fiola Timothy Ridout; a dychwelodd Circus of Horrors unwaith eto gyda chynhyrchiad anhygoel ond difyr arall. Roedd digwyddiadau misol Cyngherddau Cinio ac Aftermirth yn croesawu mwy o bobl i fwynhau’r sioeau gwych hyn, wrth i fynychwyr rheolaidd ddechrau dychwelyd i’r theatr.
Ar ôl wythnosau o ymarferion yn y Basement a’r Stiwdio, perfformiodd Operasonic eu hopera addas i deuluoedd, Nightmare Scenario. Roedd y cynhyrchiad hwn yn cynnwys y gynulleidfa yn y perfformiad wrth iddynt chwarae rhan wrth lunio sut roedd y sioe dditectif-ddirgelwch yn datblygu ac yn dod i ben yn y pen draw.
Fel anrheg Nadolig gynnar, cafodd pobl lwcus a aeth i weld y sioe hynod lwyddiannus The Fairy Tale of New York eu diddanu gan noson a oedd yn cyfuno cerddoriaeth glasurol o Iwerddon â chaneuon Nadolig poblogaidd. Roedd y sioe hon yn nodi achlysur arbennig gan mai’r sioe gyntaf yng Nglan yr Afon oedd hi lle gwerthwyd pob tocyn ers dechrau 2020.
Yn gorffen mis gwych o berfformiadau roedd Possible gan Theatr Genedlaethol Cymru. Roedd hwn yn berfformiad arbennig iawn gan fod Glan yr Afon wedi chwarae rhan enfawr wrth ddatblygu’r darn yn gynharach eleni gan ei fod yn cael ei ffrydio'n fyw o'r awditoriwm pan nad oedd theatrau'n gallu agor. Roedd hi'n noson deimladwy iawn yn gweld y darn yn ôl ar y llwyfan ac yn cael ei berfformio o flaen cynulleidfa wyneb yn wyneb.
Sinema
Ym mis Tachwedd, cafodd Theatr Stiwdio Glan yr Afon ei gweddnewid trwy osod seddi newydd eu hadnewyddu. Dathlwyd y seddi wedi’u hadnewyddu trwy ddangos ffilm James Bond: No Time to Die, gyda thocynnau am £3. Hefyd y mis hwn, dangoswyd rhaglen wythnosol amrywiol o Sinema yng nghanol y ddinas, gyda dangosiadau poblogaidd o Boss Baby 2, The French Dispatch a The Rescue.
Pobl ifanc
Cafwyd dau gynhyrchiad hudolus o The Elves and the Shoemaker gan Theatr y Sherman, un Cymraeg ac un Saesneg, a ddaeth â theuluoedd a disgyblion ysgol yn ôl i Glan yr Afon i fwynhau theatr fyw unwaith eto. Dywedodd Ysgol Gynradd Llyswyry a ddaeth â grŵp mai'r cynhyrchiad oedd y daith gyntaf allan o'r ysgol a'r profiad cyntaf o theatr fyw i lawer o'r disgyblion. Roedd yn drît gwych i bawb.
Fel rhan o'r Ŵyl Into Film aeth dros 210 o ddisgyblion o Ysgol Joseff Sant i Sinema Glan yr Afon dros ddeuddydd i fwynhau dangosiadau am ddim o Croods 2 a Horrible Histories.
Dywedodd athro o Ysgol Joseff Sant, 'Diolch am y croeso cynnes iawn. Roedd y plant mor gyffrous ac nid oedd rhai ohonynt erioed wedi gweld ffilm mewn sinema o'r blaen, felly roedd yn wych y gallem roi'r profiad hwn iddynt.'
Bu Theatr Iolo hefyd yn cynnal gweithdai ysgrifennu drama am ddim yn y Gymraeg a’r Saesneg yn Ysgol Bro Teyrnon ac Ysgol Gynradd Llyswyry. Mae Llyswyry yn parhau â'u gwaith ar Wobr y Celfyddydau gyda'r artist o Datblygu Celfyddydau Glan yr Afon, Nathan. Bob wythnos mae'r disgyblion yn dysgu am Artist Prydeinig gwahanol o dan ymbarél 'Cool Britannia.' Mae artistiaid ym mis Tachwedd wedi cynnwys Clarice Cliff a'i chrochenwaith Art Deco a golwg ar Long Danfor Felyn y Beatles. Mae Gwobr y Celfyddydau yn ffordd wych o gyflwyno dysgwyr i ystod o ymdrechion creadigol ac mae'r myfyrwyr yn ennill Tystysgrif Gwobr y Celfyddydau sy’n cydnabod eu gwaith.
Oriel
Ym mis Tachwedd agorodd arddangosfa Archif Posteri RED SHOES yn oriel mesanîn llawr cyntaf Glan yr Afon. Dan guradaeth Sean Featherstone, mae’r archif posteri hyn yn gasgliad dielw o bosteri radical yn Ne Cymru a arweinir gan artistiaid. Mae'r archif yn cynnwys posteri sy'n cynrychioli amrywiaeth eang o faterion cyfiawnder cymdeithasol fel cyfiawnder hinsawdd, hawliau sifil a dynol, cydraddoldeb, tlodi, anghydfodau diwydiannol, undod rhyngwladol a heddwch.
Yn ogystal â'r arddangosfa hon, mae darn CONSUMERSMITH a ysbrydolwyd gan y cyfnod clo, ‘May Love Be What You Remember Most', wedi'i osod yn ei leoliad parhaol. Mae printiau A3 o'r darn ar werth ar hyn o bryd o Swyddfa Docynnau Glan yr Afon. Bydd yr arian a godir o werthu'r printiau yn cael ei ail-fuddsoddi yn ôl i weithgarwch cymunedol sydd yn yr arfaeth ar gyfer 2022.
Dywedodd CONSUMERSMITH "Rwy'n credu ei bod yn wych bod Glan yr Afon yn defnyddio fy ngwaith i godi arian i ariannu prosiectau a fydd yn dod ag artistiaid a'r gymuned at ei gilydd. Holl ddiben celf stryd yw ei bod ar gyfer y bobl.'
Live at The Riverfront
Cynhaliwyd y digwyddiad cymunedol cerddoriaeth a pherfformio byw anffurfiol am ddim, Yn Fyw yng Nglan yr Afon, ddydd Gwener 26 Tachwedd i nodi dechrau penwythnos Celf ar y Bryn, a chroesawodd gynulleidfa o bob rhan o Gasnewydd i'r digwyddiad cyntedd.
Yn perfformio ym mis Tachwedd roedd y chwaraewr ffidil Kat Batchelor, y canwr gwerin acwstig Ronnie 3 Chords a'r newydd-raddedig ac enillydd Open Mic UK 2021, Josh Hicks. Mewn penwythnos prysur iawn i Josh, aeth yn ei flaen wedyn i berfformio yn nigwyddiad cynnau goleuadau Nadolig Casnewydd y diwrnod canlynol.
Mae Yn Fyw yng Nglan yr Afon yn cymryd seibiant ym mis Rhagfyr oherwydd y Nadolig a bydd yn dychwelyd ym mis Ionawr.
Celf ar y Bryn
Bob blwyddyn ym mis Tachwedd mae Celf ar y Bryn, sy’n ŵyl benwythnos, yn dathlu cymuned greadigol Casnewydd a’i gwaith. Eleni, cynhaliwyd y digwyddiad o ddydd Gwener 26 tan ddydd Sul 28 Tachwedd ac roedd yn cynnwys amrywiaeth o weithgareddau creadigol ar draws y ddinas.
Wedi'i oedi y llynedd oherwydd Covid, roedd Glan yr Afon wrth ei bodd o allu cynnal ei farchnad grefftau Celf ar y Bryn eto eleni. Trwy'r farchnad roedd Glan yr Afon yn cefnogi ac yn arddangos artistiaid a gwneuthurwyr crefftau lleol a oedd yn gwerthu amrywiaeth o grefftau hardd wedi'u gwneud â llaw. Ymhlith y stondinwyr roedd Inside Out Cymru yn gwerthu gemwaith gwifren a gleiniau bach ac addurniadau crosio a wnaed gan fynychwyr eu dosbarth crefft yng Nglan yr Afon, bagiau ffabrig gan Tommelise Danish Design, gemwaith wedi'i wneud â llaw gan Glwb Llewod Casnewydd a Dyffryn Wysg a dillad wedi'u gwneud o gotwm a gynhyrchwyd yn lleol yn yr Arfordir Ifori gan Ayoka Designs.
Yn ogystal â'r farchnad grefftau cynhaliwyd amrywiaeth o weithdai crefft dros y penwythnos gan gynnwys gweithdai ysgrifennu drama i bobl ifanc o Theatr Iolo, gweithdy ffelt i gynhyrchu broetsh wlân a gweithdy symudiadau ymwybyddiaeth ofalgar a oedd yn cynnwys cyfres o symudiadau tywys ysgafn ac arferion celf weledol.
Preswyl
Parhaodd Reality Theatre ac Inside Out Cymru â'u sesiynau wythnosol yng Nglan yr Afon trwy gydol mis Tachwedd.
Roedd perfformwyr o Gwmni Dawns Rubicon yn ymarfer yng Nglan yr Afon bob dydd Llun a dydd Iau yn paratoi ar gyfer eu sioe nesaf, The Nutcracker, mewn partneriaeth â Glan yr Afon. Wrth i'r noson agoriadol nesáu, roedd y dawnswyr ifanc yn gallu ymarfer yn ddyddiol yn y brif theatr wrth i'r sioe ddechrau dod yn fyw.
Mae aelodau o dimau Chwaraeon a Lles Cymunedol Casnewydd Fyw hefyd wedi bod yn defnyddio Theatr Stiwdio Glan yr Afon ac offer sgrin werdd i recordio fideos ar gyfer prosiectau y byddant yn gweithio arnynt mewn ysgolion yn y flwyddyn newydd. Cadwch lygad ar ein gwefan am ddiweddariadau i ddilyn.
Gweithgareddau Eraill
Mae Glan yr Afon wrth ei bodd o groesawu'r Gwasanaeth Maethu Gweithredu dros Blant (AFC). Yn ogystal â rhedeg cerameg i deuluoedd maeth, mae Clwb Pêl-droed Cymru hefyd yn cynnal eu cyfarfod cymorth misol i ofalwyr yng Nglan yr Afon. Mae'r ddau sefydliad yn cydweithio i greu rhaglen o weithgareddau celfyddydol i gefnogi teuluoedd a phlant. Bydd Glan yr Afon hefyd yn cynnal hyfforddiant sy'n seiliedig ar drawma i hwyluswyr celfyddydau i uwchsgilio ymarfer.
Y mis hwn, rhoddwyd taith o amgylch yr adeilad i'r grŵp yn ogystal â chael gwahoddiad i fynychu ymarferion Rubicon a chael cip arbennig ar The Nutcracker.
Mae Glan yr Afon hefyd yn falch o fod yn cynnal Cyngor Ieuenctid Casnewydd, gyda chymorth Danielle Rowlands. Grŵp o bobl ifanc 11-25 oed ydynt sy'n gyfrifol am sicrhau bod pobl ifanc yn cael dweud eu dweud ar faterion sy'n bwysig iddynt, gan helpu i lunio yfory ar gyfer cenedlaethau'r dyfodol.
Meddai Danielle Rowlands, Swyddog Addysg a Chyfranogiad Glan yr Afon, 'Rydym yn falch iawn o fod yn gweithio gyda Chyngor Ieuenctid Dinas Casnewydd. Mae'r Aelodau'n cwrdd yn wythnosol ac yn trafod amrywiaeth o bynciau. Rydym yn arbennig o gyffrous gan ein bod yn credu bod cysylltiad â, a chyfranogiad mewn, celf ac ymdrech greadigol, yn ogystal ag ysgogi, yn rhoi sgiliau i deimlo empathi, deall a chyfathrebu'n fwy effeithlon!'
Cewch yr wybodaeth ddiweddaraf am bopeth sydd ar ddod yng Nglan yr Afon a chewch wybod sut y gallwch gymryd rhan mewn digwyddiadau neu weithdai sydd yn yr arfaeth ar-lein yn newportlive.co.uk/GlaynYrAfon.
